تالنت ميديا تدعم الحملات الخيرية لفريق بتوع تجمعات.
كتبت : اسماء سعيد.
"بتوع تجمعات"
مجموعة من الشباب إبتدوا مشوارهم في العالم الافتراضي "مواقع التواصل الاجتماعي" يوم 9/2/2019، ديه كانت بوابة تجمعهم على أرض الواقع، كانت البداية ب 20 او30 شخص، ومع سعيهم وإنتشارهم السريع بقوا أكتر من 1600 شخص، جزء منهم بيشارك ماديا فقط، وجزء آخر بينزل بالفعل الحملات، وعشان هما دايما بيسعوا فى الخير قدروا خلال سنة واحدة يعملوا 12 حملة،
حققوا تارجت كبير، مع إن المصدر والداعم الوحيد ليهم نفسهم ومجهودهم فقط.
وإنطلاقا من شعارهم "نصنع خيرا ليبقى " بدايتهم على أرض الواقع كانت يوم 10/3/2019، بأولى حملاتهم مع بنك الطعام لتعبئة كراتين شهرية بتارجت 2400 كرتونة
اول حملة خيرية بالتعاون مع بنك الطعام المصري
وده كان إنجاز كبير لأنها أولى حملاتهم، ثم توالت الحملات بتعبئة كراتين رمضان بالتعاون مع بنك الطعام للمرة الثانية ب 6400 كرتونة
تعبئة كراتين رمضان
،ومع دخول الشهر الكريم كان من الضروري مشاركتهم فى إفطار على الطريق ثلاث مرات، وأكيد مكانش ممكن يعدي العيد الأضحي من غيرهم، تم توزيع 26 كليو لحمة وقدروا يدخلوا الفرحة على قلوب الناس
إفطار على الطريق
،وأشتركوا للمرة الثالثة مع بنك الطعام لتعبئة كراتين شهرية بتارجيت 3500 كرتونة، وبالتعاون مع جميعة رسالة وزعوا 1000 وجبة
مائدة الرحمان في رمضان بالتعاون مع بنك الطعام
،وعشان هما شعارهم "نصنع خيراً ليبقي" كان لازم الخير ده يروح للأطفال برضه، تم تنظيم حملة تبرع بالدم في مستشفى 57357، وتبرع لمستشفي أبو الريش بالأدوية، وزيارة لدار الأيتام مع توزيع هدايا للأطفال.
حملة إسعاد أطفال مستشفى 57357
ومع وضع حظر التجوال الحالي وتضرر أسر كثيرة، تم التعاون مع بنك الطعام المصري ب 22 متطوع لتعبئة 2000 كرتونة، للمشاركة فى حملة "دعم العمالة اليومية مسؤولية"
الحملة الخيرية لدعم الأسر المتضررة بالتعاون مع بنك الطعام المصري
وعلشان تالنت ميديا بتشجع المواهب الشابة ولإيماننا بشعارهم قررنا نشاركه معاهم، لما شوفنا فيهم حماسهم لمساعدة الغير بدون مقابل في وقت فيه شباب كتير غافل عن الأعمال التطوعية هما كان عندهم هدف واضح هو رسم البسمة على وجوه الناس، ودلوقتي بنسهل طرق جمع التبرعات لحملات رمضان علشان يسعدوا ناس أكتر ويصنعوا خير أكتر واكتر، لو عايز تشارك معاهم فى تعبئة شنط وكراتين رمضان وإفطار صائم على الطريق، مبلغ التبرع بيدأ من "30 جنيه" وتقدر حالاً تتبرع من خلال موقعنا وهيتم التواصل معاك فوراً.
